A historia da arte galega e, en particular, a historia da pintura moderna teñen na figura de Tino Grandío (Lousada, Lugo, 1924 — Lugo, 1977) un dos artistas cunha das linguaxes máis orixinais e complexas dentro da historia da pintura do seu tempo. A Colección de Arte ABANCA e a Colección de Arte Afundación gardan e agora amosan nesta nova mostra TINO GRANDÍO. Correspondencias, un gran conxunto de obras do autor que pode observarse cun sentido contemporáneo, poñendo en relevo o seu verdadeiro valor dentro da historia da arte en Galicia.
Para poder levar a cabo esta lectura, resulta imprescindible atender o traballo de estudo e conceptualización levado a cabo polo comisariado da mostra: Mónica Maneiro e Iñaki Martínez Antelo (Cooperativa Performa) que tiveron a visión e a capacidade de crear este diálogo entre Grandío e toda unha serie de destacados artistas do noso tempo.
COMISARIADO | Mónica Maneiro e Iñaki Martínez. Cooperativa Performa
VISITAS GUIADAS público xeral
INAUGURAL | 12 MAR 2026 | 19.00 h
HABITUAIS | 9 ABR, 7 MAI e 4 XUÑ 2026 | 19.00 h
Entradas de balde en Ataquilla.com
Información e reservas de actividades escolares e visitas para grupos no teléfono 982 289 096 ou en areaeducativalugo@afundacion.org
Esta mostra encádrase no programa solidario Cultura por Alimentos. Accede cunha doazón de produtos non perecedoiros para os bancos de alimentos locais.
Máis información
A historia da arte galega, e en particular a historia da pintura moderna, ten na figura de Tino Grandío (Lousada, Lugo, 1924 — Lugo, 1977) un dos artistas que posúe unha linguaxe máis orixinal e complexa dentro da historia da pintura do seu tempo.
A Colección de Arte ABANCA garda, entre os seus amplos fondos pictóricos, un gran conxunto de obras do autor que permite mostrar o seu traballo cun sentido de pura contemporaneidade, poñendo en relevo o seu verdadeiro valor dentro da historia da arte en Galicia, achegándolle unha renovada actualidade.
As creacións do lucense dialogan coas de 12 artistas actuais de relevancia: a tamén lucense Mónica Alonso, Carla Andrade, Vasco Araújo, Manuel Eirís, Tamara Feijoo, Xisela Franco, Christian García Bello, Julia Huete, Jesús Madriñán, Vítor Mejuto, Álvaro Negro e Eulàlia Valldosera.
A exposición «Tino Grandío. Correspondencias» organízase en base a unha revisión dos xéneros artísticos que percorreu o artista e ás súas grandes liñas temáticas: a vida social e cotiá, a paisaxe, o corpo feminino, o bodegón e a familia rural. Así que a pintura en clave xeométrica de Vitor Mejuto, por exemplo, dialoga cos retratos de Grandío e os seus achegamentos aos espazos de reunión da vida social e cultural. Ou unha peza audiovisual de Carla Andrade, Amarillo Atlántico, dialoga coa obra do guntinés máis centrada na paisaxe. O mesmo que as abstraccións de Manuel Eirís ou Mónica Alonso ou as creacións de Álvaro Negro, en diálogo coas pezas de Grandío no límite da figuración e a abstracción.
O encontro entre a visión do corpo feminino que destilan as obras de artistas como Eulàlia Valldosera, Xisela Franco e Jesús Madriñán, e a que ofrecen as obras de Grandío antes de 1977 é especialmente interesante. A exposición complétana dous diálogos: o que se dá entre os bodegóns de Grandío e a obra de Tamara Feijoo, por unha parte, e o que se dá entre as súas escenas rurais e o traballo de Christian García Bello.
Tino Grandío conectou rapidamente cos presupostos da «Nova figuración», pero a súa obra tomou rapidamente un sendeiro particular, tendo como referencias na súa renovación as obras de creadores como Velázquez, Goya ou Picasso. Executaba o artista lucense unha pintura de cariz expresionista, pero cun gran contido social. Grandío foi capaz de anticiparse temporalmente en canto a estilo ás propostas de artistas contemporáneos tan importantes como Luc Tuymans ou Gerhard Richter.
Criado no seu Guntín natal, Tino Grandío estudou bacharelato en Lugo, e despois trasladaríase a Santiago. Desde 1949 viviu en Madrid, aínda que sempre mantería unha profunda relación con Lugo e Guntín. A súa obra foi obxecto de exposicións individuais en cidades como Madrid, Barcelona, Lisboa, París ou Nova York.
Para moitas persoas e amantes da arte, esta será unha oportunidade de atoparse de novo coas súas obras, pero ao mesmo tempo, as novas xeracións sorprenderanse e gozarán coa riqueza e modernidade deste grande artista.
Esta exposición foi producida por ABANCA para o Centro Obra Social ABANCA (Praza de Cervantes) en Santiago de Compostela.
